Tikilluaritsi
Tikeraat maanilu najugaqartut nittartakkatsigut kulturikkut oqaluttuarisaaneq pillugu katersugaasivitsinnik misissuataarinissaannut tikilluaqquavut..
1600-kkunili Qeqertarsuaq Europami arfannianit ilisimaneqalersimavoq.
aatsaalliuna 1773-imi arfanniamit niuertumillu Sven Sandgreenimit tunngavilerneqartoq.
Katersugaasivimmi ataavartumik saqqummersitat tassaapput Qeqertarsuaq taamanikkut (1782-1950) Avannaani illoqarfiit pingaarnersarigallarneranit oqaluttuat.
Jakob Danielsenip (1888-1938) qalipagaanik kusanartunik aamma katersugaateqarpugut.
Jakob Danielsen maani piniartuuvoq taassumallu qalipagai ikinngutigilluagaa Avannaata naalagaa Philip Rosendahl aqqutigalugu nunarsuarmi tamarmi tusaamaneqalerput.
Qeqertap Qeqertarsuup nunataata kusanassutsimigut, naasorpassuaqarnermigut immikkullu illuinnartumik ujarattaqarnermigut ilisimaneqarluarpoq. Qeqertarsuarmi ujaqqat 1848-miilli misissugarineqartalersimapput.
Naasorsiooq Morten Porsild Qeqertarsuarmi Issittumi Ilisimatusarfimmik pilersitsisoqarnissaanik sulissutiginnittuuvoq.
Morten Porsildip 1898-mi aasakkut ilisimasassarsiornermini Qeqertarsuaq tikeqqaarpaa, tassani ilaatigut Qeqertarsuarmi naasut immikkuulluarilluinnartut misissueqataaffigisimavai.
Morten Porsild aamma, Arktisk Station, Issittumi Ilisimatusarfik (Angakkussarfik), suli ilisimatusarfiusoq, pillugu katersugaasivimmi saqqummersitaqarpoq.
Katersugaasivinnguatsinnut tamassi tikilluaqquatsigit neriuppugullu Qeqertarsuarmi qanga inuusimanermik paasisaqarluarumaartusi.
Nuannisaarluarisi.
Linda G. Ostermann, Katersugaasivimmi aqutsisoq.